[轉帖]便利店的鬼母女

便利店的鬼母女

阿June係一間便利店o既主管.最近鋪頭入面,經常唔見野,佢懷疑係員工所為,所以想設法查出真相.

為左監視佢地o既工作,阿June落班之後 , 突登企係對面街睇下. 但係企左一陣 ,似乎無乜異樣 , 兩個店員好正常咁招呼人客 . 可能因為天氣凍 , 客人比較少 , 只有兩個年青人係度焗點心 , 同埋一個細路女係雪糕櫃前面徘迴. 正當阿June準備離開 , 佢發現個細路女o羅起支甜筒 , 無俾錢就打開黎食 , 而且重舔得津津有味. 阿June諗都無諗 , 就拿起電話打番鋪 , 同店員講 , 要捉住個細路女 , 唔好俾佢偷雪糕食. 但係店員堅持話 , 鋪入面只有兩個口靚仔 , 無其他人入過.

阿June覺得好古怪 , 再向雪糕櫃望過去 , 佢依然見到個細路女係度 , 但係 , 就發覺支甜筒 , 好似食極都無少到 , 而個細路女條利 , 就越舔越長.

阿June知道唔對路 , 即刻收線走過馬路 , 點知有一把聲響佢耳邊嗌住佢,同佢講:「你俾佢食啦,我個女好恨食雪糕嫁 !」阿June應聲回頭 , 但係後面根本一個人都無.

就係阿June再望番向便利店方向o既時候 , 佢見到一個中年女人 , 拖住個細路女,由便利店行出黎 , 坐上一架早己經裝滿人o既 小巴上面.細路女個頭 , 穿過尾座乘客o既背部 , 緊貼住車尾塊玻璃 , 好奇咁望住街上風景 , 咀角重留低剛才雪糕D污積.直到小巴開出 ,呢對母女先係車箱入面消失.

呢晚之後 , 阿June重見過呢個細路女幾次 , 每次都係凌晨時份. 個細路女有時食雪糕 , 有時食糖 , 重試過企係阿June身邊 , 伸個頭埋去 , 留意佢入數o既情況. 但係為免嚇親D客人 , 阿June都會扮見佢唔到. 有時見佢鐘意食 o既 野賣晒 , 就會刻意為佢補貨. 直到呢間便利店搬走 , 阿June先無再見呢位咁特別o既小顧客.

真係鬼呢ｇａ？